Аравандагы газоблок заводу толук ишке кирсе, казынага жылына 200 млн сом түшөт
Достук айылында 1 млрд сомдук "Араван Газоблок" заводунун курулушу жүрүүдө. Ишкана ишке берилгенден кийин 70 жумуш орду түзүлөт. Бул тууралуу Ош облусундагы президенттин ыйгарым укуктуу өкүлчүлүгү билдирди.
Маалыматка ылайык, долбоор 4,82 гектар аянтты камтыйт. Завод жылына 300 миң куб метр газоблок өндүрүүгө ылайыкталат.
Белгиленгендей, долбоордун өзгөчөлүгү өндүрүшкө керектүү чийки заттын 90%ы өлкөнүн түштүк аймактарындагы жергиликтүү кендерден алынат. Бул импортту азайтып, ата мекендик ресурстарды пайдаланууга мүмкүнчүлүк берет.
Учурда заводдун курулуш иштерине 100 адам тартылган.
Өкүлчүлүктөн маалымдашкандай, ишканадан жыл сайын болжол менен 200 млн сом өлчөмүндө салыктык, социалдык жана башка милдеттүү төлөмдөр республикалык жана жергиликтүү казынага түшөт. Завод 2026-жылдын аягында толук пайдаланууга берилери айтылды.
