Чүйдө жаңы завод-фабрикаларды ачууга даярдык көрүлүүдө
Чүй облусунда жаңы өндүрүш объектилерин ачууга даярдык көрүү жана аймакка инвестиция тартуу маселелери талкууланды. Бул тууралуу Инвестициялар боюнча улуттук агенттиктен билдиришти.
Маалыматка ылайык, Улуттук агенттиктин башчысы Равшанбек Сабировдун тапшырмасы менен агенттиктин башчысынын орун басары Мээримбек Койчуманов Чүй облусундагы жергиликтүү бийлик органдарынын өкүлдөрү менен бир катар жолугушууларды өткөрдү.
Жолугушууларда инвесторлор үчүн жагымдуу шарттарды түзүү, мамлекеттик жана жергиликтүү өз алдынча башкаруу органдарынын бизнес өкүлдөрү менен кызматташуусун жакшыртуу, ошондой эле жаңы инвестициялык долбоорлорду ишке ашыруунун перспективдүү багыттарын аныктоо маселелери талкууланды.
Мындан тышкары, аймакка инвестиция тартуу, учурда ишке ашырылып жаткан долбоорлорду колдоо жана Чүй облусунун инвестициялык потенциалын мындан ары өнүктүрүү боюнча пикир алмашуу болду.
Жыйынтыгында тараптар инвестициялык долбоорлорду коштоо боюнча биргелешкен ишти жана өз ара координацияны күчөтүү, ошондой эле инвесторлор үчүн жагымдуу шарттарды түзүү боюнча макулдашты.
Иш сапардын алкагында Улуттук агенттиктин өкүлдөрү "Аква Пром" жана "Хуа Руй" ишканаларынын өндүрүш объектилерин да кыдырышты. Алар ишканалардын ишмердүүлүгү, өндүрүштүк кубаттуулугу жана ишке ашырылып жаткан долбоорлор менен таанышты.
Ошондой эле ишканалардын учурдагы маселелери жана мындан аркы өнүгүү перспективалары талкууланды.
