Кыргызстанда органикалык өндүрүш аянты 101 миң гектардан ашты
Кыргызстанда органикалык айыл чарбасын өнүктүрүү боюнча иштер уланууда. 2026-жылдын 30-июнуна карата республикада органикалык өндүрүшкө тартылган жерлердин жалпы аянты 101 358,21 гектарды түздү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Кайра иштетүү өнөр жайы жана органикалык айыл чарба департаментинин маалыматына ылайык, өлкөдө 11 кооператив эл аралык органикалык стандарттарга ылайык продукция өндүрүп, кайра иштетет. Алардын алтоо 2025-жылы сертификат алган.
Кооперативдер пахта, дары чөптөр, өрүк, төө буурчак, грек жаңгагы, мисте жана башка айыл чарба продукцияларын өндүрүп, ички жана тышкы рынокторго чыгарышат. Бул багыттагы жерлердин аянты 11 392 гектарды түзөт.
Мындан тышкары, 37 аймакта органикалык өндүрүш үчүн PGS — катышуучулук кепилдик системасын киргизүү иштери жүрүүдө. Бул аймактардагы жалпы аянт 85 257,04 гектарды түзүп, негизинен жашылча-жемиштер өстүрүлөт.
Ошондой эле облустарда жалпы аянты 4 709,17 гектарды түзгөн пилоттук жеке чарбалар уюштурулуп, өндүрүүчүлөргө PGS жана эл аралык сертификация талаптары боюнча билим берилүүдө.
Органикалык өндүрүштү кеңейтүү жана кыргызстандык органикалык продукциянын ички жана тышкы рыноктордогу мүмкүнчүлүктөрүн жогорулатуу боюнча иштер улантылат.
