Балык чарбасында жаңы долбоорлор: өндүрүш жана кайра иштетүү кеңейет
Суу ресурстары, айыл чарба жана кайра иштетүү өнөр жайы министри Эрлист Акунбеков 12-августта "Салих Аква" балык чарба комплексинин ишмердүүлүгү менен таанышты.
Маалыматка караганда, ишкана жылына 5 миң тонна балык тоютун өндүрүү, икра инкубациялоо, чабактарды өстүрүү, асыл тукум жана товардык балык чарбасын жүргүзүү, ошондой эле балыкты кайра иштетүү багыттары боюнча иш алып барат.
Учурда заводдо жылына 3 миң тоннага чейин азык өндүрүү үчүн даярдык иштери аяктап жатат. Бул өзүнүн продукциясы менен катар өлкөдөгү башка чарбалардын балыгын да кайра иштетүүгө мүмкүнчүлүк берет.
Мындан тышкары, компаниянын аймактардагы эки долбоору тууралуу маалымат берилди. Күрп-Сай суу сактагычындагы жилингир өстүрүүчү чарбада 2030-жылга чейин жылына 5 миң тоннага чейин азык өндүрүү пландалууда.
Ал эми Жалал-Абад облусунун Сузак районунда жылына 270 тонна балык өндүрүүгө багытталган чарба өнүктүрүлүүдө.
