Чолпон-Атадагы ЕАЭБ жыйынында үч макулдашууга кол коюлду
6-7-августта Чолпон-Ата шаарында өткөн Евразия өкмөттөр аралык кеңешинин жыйынында үч макулдашууга кол коюлду. Бул тууралуу экономика жана коммерция министринин орун басары Султан Ахматов маалымат жыйынында билдирди.
Ведомствонун маалыматына ылайык, жыйындын күн тартибине 15 маселе киргизилип, анын 13ү кеңейтилген форматта каралды.
Биринчи макулдашуу ЕАЭБдин ички рыногунда электрондук сооданы өнүктүрүүгө багытталган. Документ онлайн соода үчүн бирдиктүү эрежелерди түзүп, керектөөчүлөрдүн жана ишкерлердин укуктарын коргоону, электрондук документ жүгүртүүнү жана маалыматтык коопсуздукту камсыздоону карайт.
Экинчи макулдашуу ЕАЭБ өлкөлөрүндөгү брокерлер менен дилерлердин лицензияларын өз ара таанууга жана башка мүчө мамлекеттердин биржалык соодасына түз катышуусуна шарт түзөт.
Үчүнчү документ илимий наамдарды өз ара таанууга байланыштуу. Ага ылайык, илимий жана илимий-педагогикалык кызматкерлердин тиешелүү документтери кошумча таануу жол-жоболорунан өтпөстөн кабыл алынат.
Мындан тышкары, жыйында ЕАЭБ өлкөлөрүнүн азык-түлүк коопсуздугу талкууланып, 2021–2025-жылдардагы иштердин жыйынтыгы чыгарылды. Тараптар азык-түлүк көз карандысыздыгын бекемдөө, өз ара сооданы өнүктүрүү жана үчүнчү өлкөлөрдөн импортко болгон көз карандылыкты азайтуу маселелерине көңүл бурушту.
Евразия өкмөттөр аралык кеңешинин кийинки жыйынын 2026-жылдын 1–2-октябрында Минск шаарында өткөрүү пландалууда.
