"Кыргызфармациядагы" мыйзам бузуулар 138 млн сомго жакын зыян алып келди
"Кыргызфармация" мамлекеттик ишканасында дары-дармек жана медициналык буюмдарды сатып алууда мыйзам бузуулар аныкталды. Бул тууралуу Башкы прокуратурадан билдиришти.
Маалыматка ылайык, 2024–2026-жылдары айрым сатып алуулар саламаттык сактоо уюмдарынын чыныгы муктаждыктары эске алынбастан жүргүзүлгөн.
Текшерүүнүн жүрүшүндө жалпы баасы 74,1 млн сом болгон дары-дармектердин 60 түрүнүн жарактуулук мөөнөтү өтүп кеткендиги аныкталган.
Мындан тышкары, саламаттык сактоо уюмдарынан тиешелүү билдирмелер болбосо да, ири көлөмдө медициналык буюмдар сатып алынган. Натыйжада 63,8 млн сомдон ашык суммадагы өндүрүмдөр кампаларда пайдаланылбай калган.
Башкы прокуратуранын алдын ала эсептөөсү боюнча, аныкталган мыйзам бузуулардан мамлекетке келтирилген зыяндын көлөмү 137 млн 950 миң сомду түзөт.
Бул фактылар боюнча Кылмыш-жаза кодексинин 337-беренеси ("Кызмат абалынан кыянаттык менен пайдалануу") жана 339-беренеси ("Билип туруп пайдасыз контракт түзүү") менен иш козголгон.
Учурда тергөө амалдары жүргүзүлүүдө.
