Кыргызстан ЕАЭБде агроөнөр жай кооперациясын күчөтүүнү сунуштады
Бүгүн Алматыда Евразия экономикалык бирлигинин Агроөнөр жай саясаты боюнча кеңешинин жетинчи жыйыны өтүүдө. Ага Кыргызстандын атынан суу ресурстары, айыл чарба жана кайра иштетүү өнөр жайы министри Эрлист Акунбеков катышууда. Бул тууралуу ведомстводон билдиришти.
Жыйында Кыргызстан ЕАЭБдин алкагында агроөнөр жай тармагындагы кызматташтыкты күчөтүп, өз ара сооданы кеңейтүүнү жана биргелешкен долбоорлорду көбөйтүүнү сунуштады.
Эрлист Акунбеков заманбап агротехнологияларды жана санариптик чечимдерди киргизүү, биргелешкен өндүрүштүк чынжырларды түзүү, кайра иштетүү тармагын өнүктүрүү жана соодадагы негизсиз тоскоолдуктарды жоюу зарылдыгын белгиледи.
Ошондой эле кыргызстандык ишканалардын айыл чарбасындагы биргелешкен долбоорлорду каржылоо механизмдерине жеткиликтүүлүгүн кеңейтүүгө өзгөчө көңүл бурулду.
Министрдин айтымында, мындай долбоорлор жаңы өндүрүштүк чынжырларды түзүп, кайра иштетүүнүн жана өз ара сооданын көлөмүн көбөйтүүгө, ошондой эле ЕАЭБ өлкөлөрүнүн азык-түлүк коопсуздугун бекемдөөгө шарт түзөт.
Маалыматка ылайык, 2025-жылы Кыргызстандын ЕАЭБге мүчө мамлекеттер менен өз ара соодасы 832,2 млн долларды түзгөн.
Кыргызстан айыл чарба жана кайра иштетилген продукциялардын түрүн кеңейтүү, ошондой эле кошумча наркы жогору товарлардын үлүшүн көбөйтүү аркылуу соода көлөмүн мындан ары жогорулатууга мүмкүнчүлүк бар экенин белгиледи.
