Кыргызстанда BARS бренди менен электромобилдер чыгарыла баштайт
Кыргызстанда BARS улуттук бренди менен электр кыймылдаткычында иштеген автоунааларды чыгаруу пландалууда. Учурда автомобиль өнөр жай кластерин түзүү боюнча долбоордун даярдыгы 75%га жетти. Бул тууралуу Экономика жана коммерция министрлигинен билдиришти.
Долбоордун алкагында жеңил, коммерциялык жана атайын багыттагы электр унааларын өндүрүү жана чогултуу каралган.
Алгач өндүрүш ири түйүндүү чогултуу ыкмасы менен башталып, кийин майда түйүндүү чогултууга жана толук өндүрүш циклине өтүү пландалууда. Мунун негизинде автоунаа тетиктерин жергиликтүү өндүрүшкө киргизүү жана инженердик-техникалык мүмкүнчүлүктөрдү өнүктүрүү көздөлүүдө.
Ишкананын өндүрүштүк кубаттуулугу жылына 10 миңге чейин автоунааны түзөт. Долбоор 15 гектар аянтта ишке ашырылып, 100 жаңы жумуш ордун түзүү каралган.
Кыргызстанда чыгарылган BARS автоунаалары ички рынокко гана эмес, Борбордук Азия өлкөлөрүнө жана Евразия экономикалык бирлигине мүчө мамлекеттерге экспорттоого багытталат.
Маалыматка ылайык, ишкананы 2026-жылдын үчүнчү кварталында ишке киргизүү пландалууда. Долбоор толугу менен демилгечинин өз каражатынын эсебинен каржыланат. Мамлекет тарабынан жер тилкесин берүү боюнча колдоо көрсөтүлгөн.
Долбоор ата мекендик машина куруу тармагын өнүктүрүүгө, заманбап өндүрүш технологияларын киргизүүгө, жаңы жумуш орундарын түзүүгө жана өлкөнүн экспорттук мүмкүнчүлүктөрүн кеңейтүүгө багытталган.
