Алматыда Кыргызстан менен Казакстандын агрардык кызматташтыгы талкууланды
Кечээ Алматы шаарында Суу ресурстары, айыл чарба жана кайра иштетүү өнөр жайы министри Эрлист Акунбеков менен Казакстандын Айыл чарба министри Айдарбек Сапаров жолугушту. Бул тууралуу ведомстводон билдиришти.
Тараптар азык-түлүк буудайын туруктуу жеткирүү, орус буудайын Казакстан аркылуу транзиттөө жана минералдык жер семирткичтерди жеткирүү маселелерин талкуулашты.
Министрлер Кыргызстан менен Казакстандын агрохолдингдеринин катышуусунда азык-түлүк буудайын жеткирүү маселесин иштеп чыгууга даяр экенин билдиришти. Кыргыз тарап орус буудайынын Казакстан аркылуу үзгүлтүксүз транзитин камсыз кылууну сунуштап, казак буудайын сатып алууну көбөйтүүгө кызыкдар экенин белгиледи.
Ошондой эле айыл чарба продукциясын кайра иштетүүгө инвестиция тартуу, логистиканы өнүктүрүү, тармакты санариптештирүү жана асыл тукум мал чарбасындагы кызматташтык талкууланды.
Жолугушуунун жыйынтыгында тараптар биргелешкен долбоорлорду ишке ашыруу боюнча кызматташууну улантууга даяр экенин билдиришти.
