Кыргызстанда 30 миң көрүүчүгө ылайыкталган ипподром куруу пландалууда
13-августта Инвестициялар боюнча улуттук агенттиктин башчысы Равшанбек Сабиров Ички Монголиянын Талаа маданиятын коргоо жана өнүктүрүү фондунун жана Гонконг Жокей-клубунун өкүлдөрү менен жолугушту. Бул тууралуу агенттиктен билдиришти.
Жолугушууда Кыргызстанда эл аралык ат спорт комплексин түзүү долбоору тааныштырылды. Комплексте эл аралык деңгээлдеги ипподром, машыгуу базалары, атканалар, ветеринардык жана селекциялык-генетикалык борборлор, мейманкана жана кыргыз жылкы чарбасынын тарых музейин куруу каралууда.
Алдын ала маалымат боюнча, комплекс 70 гектарга жакын аянтка жайгашып, 30 миң көрүүчүгө ылайыкталат. Анда 3 миңге чейин жылкы кармоого шарт түзүлүп, 500дөн ашык орундуу мейманкана куруу пландалууда.
Равшанбек Сабиров долбоорду экономикалык жактан негиздүүлүгүн жана Кыргызстандын мыйзамдарынын талаптарын эске алуу менен кылдат иштеп чыгуу зарылдыгын белгиледи.
Комплексте келечекте эл аралык мелдештерди, асыл тукум жылкылардын көргөзмөлөрүн жана аукциондорун өткөрүү пландалууда. Долбоор ат спортун, жылкы чарбасын жана туризмди өнүктүрүүгө багытталат.
Тараптар долбоордун техникалык-экономикалык негиздемесин даярдоо, жер тилкесин аныктоо жана инвестициялык моделин иштеп чыгуу боюнча иштерди улантууну макулдашты.
