Жалал-Абадда туризмди өнүктүрүүгө инвестиция тартуу талкууланды
Жалал-Абад облусунда туризм тармагын өнүктүрүү боюнча жыйын өтүүдө. Бул тууралуу Президенттин Жалал-Абад облусундагы өкүлчүлүгүнөн билдиришти.
Ага Президенттин Жалал-Абад облусундагы ыйгарым укуктуу өкүлүнүн биринчи орун басары Шабдан Абдырайым уулу, орун басары Исламбек Увайдуллаев, Туризмди өнүктүрүү боюнча мамлекеттик агенттиктин директору Эдуард Кубатов, мамлекеттик мекемелердин, жергиликтүү бийликтин жана туризм тармагынын өкүлдөрү катышууда.
Жыйында облустагы туризмдин учурдагы абалы, инфраструктураны жакшыртуу, инвестиция тартуу, туристтер үчүн коопсуз жана ыңгайлуу шарттарды түзүү, тейлөө сапатын жогорулатуу жана жаңы туристтик багыттарды өнүктүрүү маселелери талкууланууда.
Шабдан Абдырайым уулу Жалал-Абад өлкөдөгү туристтик мүмкүнчүлүгү жогору аймактардын бири экенин белгиледи. Анын айтымында, облустун жаратылышы, тарыхый-маданий мурастары, ыйык жайлары, көлдөрү жана жаңгак токойлору ички жана чет элдик туристтерди тартууга мүмкүнчүлүк берет.
Ошондой эле туристтик потенциалды натыйжалуу пайдалануу жана туризмди өнүктүрүү боюнча мамлекеттик органдардын кызматташтыгын күчөтүү маселеси каралууда.
