Кыргызстанда чакан жана орто ишканалардын саны 27,3 миңге жетти
Кыргызстанда чакан жана орто ишканалардын саны 6,8% өсүп, 27,3 миңге жетти. Бул тууралуу Министрлер Кабинетинин төрагасы Адылбек Касымалиев кезектеги аппараттык кеңешмеде билдирди.
Ошондой эле чакан жана орто ишкердик жана жеке ишкердик чөйрөсүндө иш менен камсыз болгондордун саны 6,8% көбөйүп, 643,8 миң адамга жетти.
Адылбек Касымалиев кеңешмеде чакан жана орто ишкердикти комплекстүү колдоого өзгөчө көңүл бурду. Анын айтымында, Өкмөт тарабынан ата мекендик ишкерлер үчүн мамлекеттик программалар жана жеңилдетилген кредиттөө долбоорлору ишке ашырылууда.
Алдын ала маалыматтар боюнча, 2025-жылы ЧОИ субъекттери тарабынан өндүрүлгөн жалпы кошумча нарктын көлөмү 1 трлн 15 млрд сомду түзгөн. 2024-жылы бул көрсөткүч 657,1 млрд сом болгон.
"Чакан жана орто ишканалардын саны 6,8%га өсүп, 27,3 миңди түздү. ЧОИ жана жеке ишкердик чөйрөсүндө иш менен камсыз болгондордун саны 6,8%га көбөйүп, 643,8 миң адамга жетти", – деп белгиледи Министрлер Кабинетинин башчысы.
