Кыргызстандын экономикасы 7 айда 11,1% өстү
Министрлер Кабинетинин төрагасы Адылбек Касымалиев кезектеги аппараттык кеңешмеде 2026-жылдын январь-июль айларындагы өлкөнүн социалдык-экономикалык өнүгүүсүнүн негизги көрсөткүчтөрүн жарыялады. Бул тууралуу Өкмөттүн басма сөз кызматынан билдиришти.
Алдын ала баалоого ылайык, 2026-жылдын 7 айынын жыйынтыгы боюнча Кыргызстандын ички дүң продуктунун көлөмү 1 трлн 172,7 млрд сомду түзүп, реалдуу өсүү темпи 11,1% болду.
Экономикалык өсүшкө негизги тармактар оң салым кошту. Курулуш тармагында өсүш 60,6%, өнөр жайда 11,2%, кызмат көрсөтүү чөйрөсүндө 6,1%, айыл чарбасында 6,0% түздү.
Өнөр жайда химиялык продукция өндүрүү 2,9 эсеге, тазартылган мунайзаттарды өндүрүү 1,8 эсеге көбөйдү. Транспорт каражаттарын өндүрүү 41,8%, курулуш материалдарын өндүрүү 33,6%, пайдалуу кендерди казып алуу 16,9%, фармацевтикалык продукция өндүрүү 13% өстү.
Мындан тышкары, жыл башынан бери негизги капиталга салынган инвестициялардын көлөмү 238,3 млрд сомго жетип, өткөн жылдын ушул мезгилине салыштырмалуу 58,8% өстү.
Адылбек Касымалиев мындай экономикалык динамиканы жогору жана позитивдүү деп баалады.
