Тоңдогу балык өстүрүү борборунун курулушу аяктоо алдында
Суу ресурстары, айыл чарба жана кайра иштетүү өнөр жайы министрлигине караштуу Балык өнөр жайы комплекси департаментинин жетекчилиги Корея деңиз институтунун директору Жо Жоңхи жана институттун өкүлдөрү менен жолугушту.
Ведомствонун маалыматына ылайык, жолугушууда Ысык-Көл облусунун Тоң районундагы Аквакультура жана балык өстүрүү регионалдык борборунун курулушун аяктоо жана аны расмий ачууга даярдык көрүү маселелери талкууланды.
Тараптар борборду пайдаланууга берүү үчүн зарыл болгон документтерди мыйзам талаптарына ылайык даярдоо маселесине да токтолушту. Тиешелүү документтер толук даярдалып, белгиленген талаптар аткарылгандан кийин борборду кабыл алуу иштери башталат.
Жаңы борбор аквакультура жана балык өстүрүү тармагын өнүктүрүүгө, заманбап технологияларды киргизүүгө жана эл аралык кызматташтыкты кеңейтүүгө багытталган.
