Эт кымбаттап, жашылча арзандады: жыл башынан бери баалар кандай өзгөрдү?
Жыл башынан бери керектөө баалары 6,7%га өстү. Бул тууралуу Экономика жана коммерция министрлиги маалымдайт.
Маалыматка ылайык, үстүбүздөгү жылдын январь-июль айларында орточо жылдык инфляция 2025-жылдын тиешелүү мезгилине салыштырмалуу 10,7%ды түздү.
Тамак-аш азыктары жана алкоголсуз суусундуктар 5,9%га, алкоголдук ичимдиктер жана тамеки 7,1%га, азык-түлүк эмес товарлар 5,1%га кымбаттады. Калкка көрсөтүлгөн кызматтардын тарифтери 10,1%га жогорулады.
Азык-түлүктүн ичинен мөмө-жемиштердин баасы 16%га, эт азыктары 14,5%га өстү. Кой эти 23,1%га, жылкы эти 16%га, уй эти 14,2%га кымбаттады.
Министрликтин маалыматына ылайык, эттин кымбатташына дүйнөлүк баалардын өзгөрүшү, ички сунуштун кыскарышы, сезондук факторлор, ошондой эле тоют, ветеринардык тейлөө жана логистикалык чыгымдардын өсүшү таасир эткен.
Мөмө-жемиштердин кымбатташы сезондук факторлорго, импортко болгон көз карандылыкка жана транспорттук-логистикалык чыгымдардын өсүшүнө байланыштуу.
Сүт азыктарынын, сырдын жана жумуртканын баасы 7,8%га өстү.
Ошол эле учурда жаңы жашылчалар 24,8%га, картошка 10,7%га, куюп сатылуучу сүт 4%га, күрүч 0,2%га арзандады. Жашылчалардын арзандашы жаңы түшүмдүн эсебинен ата мекендик продукциянын сунушунун көбөйүшү менен байланыштуу.
