“Коопсуз шаардан” түшкөн акчанын жарымы тез жардам унааларын сатып алууга жумшалат
Кыргызстанда “Коопсуз шаар” системасынын алкагында түшкөн айып пулдардан калган каражаттын 50%ы тез жардам унааларын сатып алууга жана аларды медициналык жабдуулар менен камсыздоого багытталат. Тиешелүү өзгөртүүлөр Министрлер кабинетинин “Акылдуу шаар” долбоорунун “Коопсуз шаар”компонентин мындан ары өнүктүрүү боюнча токтомуна киргизилди.
Документке ылайык, автоматташтырылган “Укук бузуулардын бирдиктүү реестринде”катталган мыйзам бузуулар үчүн салынган айып пулдардан түшкөн каражаттарды түзүү жана пайдалануу тартиби өзгөрөт.
Учурдагы тартипте каралган чыгымдар төлөнгөндөн кийин калган каражат республикалык бюджетке түшүп, жаңы схема боюнча бөлүштүрүлөт.
Каражаттын жарымы Саламаттык сактоо министрлигине берилет. Аны тез жардам унааларын сатып алууга жана аларды зарыл медициналык жабдуулар менен камсыздоого пайдаланууга уруксат берилет.
Калган 50%ы республикалык бюджетке чегерилет. Ошол эле учурда Укук бузуулардын бирдиктүү реестри боюнча салынган айып пулдарга эсептелген туумдар бул схема боюнча бөлүштүрүлбөйт. Алар толугу менен республикалык бюджетке түшөт.
Министрлер кабинетинде бул өзгөртүүлөр шашылыш медициналык жардам көрсөтүүнүн сапатын жогорулатуу зарылдыгына байланыштуу киргизилгенин билдиришти.
Саламаттык сактоо министрлигине өз чечимдерин токтомго ылайык келтирүү жана зарыл чараларды көрүү тапшырылды. Ал эми Финансы министрлиги 2026-жылга республикалык бюджет жана 2027–2028-жылдарга пландуу мезгил боюнча мыйзамга өзгөртүүлөрдү даярдоодо жаңы тартипти эске алышы керек.
