VIN-коду өзгөртүлгөн жүк ташуучу унаадан 1,7 млн сом өндүрүлдү
"Түндүк-Чыгыш" бажысынын кызматкерлери "Торугарт" өткөрүү пункту аркылуу Кыргызстанга киргизилген Foton Auman Daimler үлгүсүндөгү жүк ташуучу автоунаанын идентификациялык номери өзгөртүлгөнүн аныкташты. Бул тууралуу Мамлекеттик бажы кызматынан билдиришти.
Текшерүүдө унаанын документте көрсөтүлгөн чыгарылган жылы менен иш жүзүндөгү маалыматтары дал келбегени белгилүү болгон. Соттук-эксперттик кызматтын корутундусуна ылайык, VIN-коддун 10-позициясы 2019-жылды көрсөткөн, ал эми автоунаа иш жүзүндө 2014-жылы чыгарылган.
Мындан тышкары, автоунаанын шассисиндеги заводдук идентификациялык номер өчүрүлүп, анын ордуна башка номер түшүрүлгөнү аныкталган.
Бул факты боюнча 1 млн 702,9 миң сом бажы төлөмү эсептелди. Маалымат Кылмыштардын бирдиктүү реестрине киргизилип, материалдар Мамлекеттик бажы кызматынын Тергөө башкармалыгына өткөрүлдү.
Натыйжада мамлекетке келтирилген 1 млн 702 миң 938 сом зыян толугу менен өндүрүлдү.
