Бишкектеги эки ири долбоорго 600 млн доллардан ашык инвестиция каралган
Бишкекте ири көп функционалдуу комплекстерди курууга багытталган эки инвестициялык долбоор ишке ашырылууда. "Ак-Кула" ат майданынын мурдагы аймагындагы комплекс менен "Бишкек-Сити" долбоорлоруна жалпы 600 млн доллардан ашык инвестиция каралган.
Мэриянын маалыматына ылайык, "Ак-Кула" ат майданынын мурдагы аймагында көп функционалдуу комплекс куруу долбоорунун инвестициялык көлөмү 300 млн доллардан ашат. Учурда курулуш жана аймакты көрктөндүрүү иштери башталган.
Ошондой эле "Туран Сити" компаниясы менен биргеликте "Бишкек-Сити" көп функционалдуу комплексининдолбоору ишке ашырылууда. Ага 300 млн доллар өлчөмүндө инвестиция тартуу каралган. Долбоор заманбап шаардык жана коомдук инфраструктура объектилерин түзүүнү көздөйт.
Мындан тышкары, Бишкекте инвестициянын көлөмү 1,2 млрд сомду түзгөн "Оптима" турак жай комплексинин долбоору иштелип чыккан. Анда турак жайлар, парк, эс алуу зоналары, билим берүү жана маданий инфраструктура объектилери каралган.
Мамлекеттик-жеке өнөктөштүктүн алкагында шаардагы эки теннис комплексин реконструкциялоо долбоорлору да ишке ашырылууда. Аларга жалпы 440 млн сомдон ашык инвестиция каралган.
Бул долбоорлор борбор калаада жаңы шаардык объектилерди түзүүгө, инфраструктураны өнүктүрүүгө жана инвестициялык активдүүлүктү жогорулатууга багытталган.
