Бишкектин тазалоочу курулмалары 56 млн долларга жаңыланууда
Бишкек шаарында транспорттук жана коммуналдык инфраструктураны жаңылоого багытталган бир катар ири долбоорлор ишке ашырылууда. Бул тууралуу мэриянын басма сөз кызматынан билдиришти.
"Бишкек шаарынын көчө-жол тармагын өнүктүрүү (3-фаза)" жана "Бишкек шаарындагы транспорттук жол түйүндөрү" долбоорлорунун алкагында Курманжан Датка көчөсүн реконструкциялоо жана үч транспорттук жол түйүнүн куруу каралган. Долбоорлор боюнча гранттык каржылоонун жалпы көлөмү 32,6 млн долларды түзөт.
Мындан тышкары, мамлекеттик-жеке өнөктөштүктүн алкагында Бишкек шаарынын тазалоочу курулмаларын реконструкциялоо жана модернизациялоо долбоору ишке ашырылып жатат. Ага 56 млн доллар көлөмүндө инвестиция каралган. Иштер аяктагандан кийин саркынды сууларды тазалоонун жалпы кубаттуулугу суткасына 500 миң куб метрге чейин жетет.
Долбоорлор шаардын жол-транспорттук байланышын жакшыртууга жана коммуналдык инфраструктуранын мүмкүнчүлүктөрүн кеңейтүүгө багытталган.
