Кыргызстанда Juventus футбол академиясын ачуу пландалууда
Бүгүн Инвестициялар боюнча улуттук агенттикте Juventus Academy Kyrgyzstan инвестициялык долбоорун ишке ашыруу маселеси талкууланды. Бул тууралуу аталган агенттиктен билдиришти.
Жыйын Улуттук агенттиктин башчысынын орун басары М.Н. Койчумановдун жетекчилиги алдында өттү.
Долбоордун алкагында Бишкек шаарында балдар-өспүрүмдөр футбол борборун, ал эми Ысык-Көл облусунда эл аралык окуу-машыгуу комплексин түзүү каралууда.
Бишкекте спорттук-билим берүү комплексин куруу үчүн аянты 3–5 гектар болгон жер тилкесин бөлүү пландалууда. Комплексте футбол аянтчалары, жабык манеж, ошондой эле 250–400 окуучуга ылайыкталган билим берүү мектеби жайгашат.
Жыйындын жүрүшүндө долбоор үчүн жер тилкесин тандоо, аны ишке ашыруу механизмдерин аныктоо жана тиешелүү мамлекеттик органдар менен мындан аркы кызматташуу маселелери каралды.
Juventus Academy Kyrgyzstan долбоору балдар жана өспүрүмдөр футболун өнүктүрүүгө, жаш спортчуларды кесипкөй деңгээлде даярдоого, ошондой эле ата мекендик машыктыруучулардын квалификациясын жогорулатууга багытталган.
