Кыргызстанда туризмдин экономикадагы үлүшү 3,8%га жетти
Кыргызстанда туризм тармагынын экономикадагы ролу өсүп жатат. 2025-жылдын жыйынтыгы боюнча туризм чөйрөсүндө түзүлгөн кошумча дүң нарк 74 млрд сомдон ашып, өлкөнүн ички дүң продукциясынын 3,8%ын түздү. Бул көрсөткүч 2021-жылы 3,2% болгон.
Улуттук статистика комитетинин маалыматына караганда, 2025-жылы туризм тармагына 87 млн доллардан ашык түз чет элдик инвестиция тартылган. Бул 2024-жылга салыштырмалуу 7,8 эсеге көп.
Туризмге тартылган чет элдик инвестициялардын негизги бөлүгү Нидерландга туура келип, жалпы көлөмдүн 72,8%ын түзгөн. Андан кийинки орундарда Бириккен Араб Эмираттары — 8,2%, Өзбекстан — 5%, Швейцария — 4,3% жана Россия — 4,1% менен турат.
Ошол эле учурда 2025-жылы туризм объекттеринин курулушуна негизги капиталга 19,5 млрд сом инвестиция өздөштүрүлгөн. Бирок бул көрсөткүч 2024-жылга салыштырмалуу 27%га төмөндөгөндүгү маалым болду.
Туризм тармагындагы кызмат көрсөтүүлөрдүн көлөмү да өскөн. 2025-жылы калкка 7,6 млрд сомдук туристтик-экскурсиялык кызмат көрсөтүлгөн. Бул 2024-жылга караганда 1,2 эсеге көп. Ал эми мейманканалардын жана кыска мөөнөткө жайгаштыруу үчүн башка жайлардын кызмат көрсөтүүлөрү 11 млрд сомдон ашып, бир жылда 9,9%га көбөйгөн.
Статистикалык маалымат боюнча, 2025-жылы Кыргызстанда 5,3 млн адам эс алган. Бул 2024-жылга салыштырмалуу 1,5 эсеге көп.
КРнын Мамлекеттик чек ара кызматынын маалыматына ылайык, 2025-жылы - чет элдик жарандардын КРнын чек арасын кесип өтүүлөрүнүн саны 10,5 млн. учурду түзгөн. Чек араны кесип өтүүлөрдүн (келүүлөрдүн) көпчүлүгү - Өзбекстан, Казакстан, Россия жана Кытай өлкөлөрүнүн жарандарына туура келет.
