Ирандан келген 22 тонна нектарин артка кайтарылды
Жалал-Абад облусундагы "Кең-Сай" фитосанитардык контролдук постунда Ирандан Кыргызстанга импорттолгон 22 тонна нектарин (түксүз шабдалы мөмөсү) текшерилди. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Фитосанитардык көзөмөл учурунда продукциянын таңгагында Кыргыз Республикасынын жана Евразия экономикалык бирлигинин талаптарына ылайык милдеттүү маркировка жок экени аныкталды.
Тиешелүү маркировкасыз карантинге алынуучу продукцияны өлкө аймагына алып кирүү ЕАЭБдин бирдиктүү карантиндик фитосанитардык талаптарын бузуу болуп саналат.
Мындан улам 22 тонна нектарин Кыргызстандын аймагына киргизилбей, жүк жөнөтүүчү тарапка кайра кайтарылды.
