Салык кызматы айрым салык төлөөчүлөргө жеңилдик берүүнү сунуштады
Мамлекеттик салык кызматы 2025-жылдын 1-сентябрынан 2026-жылдын 31-августуна чейинки мезгилде бирдиктүү салыкты жана сатуудан алынуучу салыкты эсептик каттоого турган жери боюнча эмес, салыктык катталган жери боюнча төлөгөндөрдү салыктык жоопкерчиликтен бошотууну сунуштады.
Буга чейин айрым салык төлөөчүлөр аталган салыктарды эсепке турган жеринин ордуна салыктык катталган жери боюнча төлөп келишкен. Бул салык мыйзамдарынын талаптарын бузуу болуп саналат.
Маселени жөнгө салуу үчүн Салык кызматы тиешелүү ченемди иштеп чыгып, Экономика жана коммерция министрлигине мыйзам долбооруна киргизүү үчүн жөнөттү. Ага ылайык, көрсөтүлгөн мезгилде мындай учурларга байланыштуу салыктык жоопкерчилик чаралары колдонулбайт.
Ошол эле учурда 2026-жылдын август айындагы салыктык милдеттенмелерден тартып, төлөө мөөнөтү сентябрда келген учурда, бирдиктүү салык жана сатуудан алынуучу салык эсептик каттоого турган жер боюнча төлөнүшү керек.
Салык кызматы төлөөчүлөрдү эсепке турган жерин жана төлөм реквизиттерин алдын ала текшерүүгө чакырат.
