Терек-Сай кенинен мамлекеттик казынага 9 млрд сомдон ашык каражат түшкөн
Президент Садыр Жапаровдун колдоосу жана мамлекет тарабынан кабыл алынган саясий чечимдердин негизинде Терек-Сайдагы тоо-кен өндүрүшү кайра жанданып, бүгүнкү күндө өлкө экономикасына реалдуу пайда алып келе баштады. Бул тууралуу президенттин өзгөчө тапшырмалар боюнча атайын өкүлү Бакыт Төрөбаев билдирди.
Маалыматка ылайык, 2016-жылдан кийин ишканага инвесторлор тартылып, 2022-жылы техникалык банкроттук абалга байланыштуу мамлекет тарабынан инвесторлорду колдоо максатында жаңы инвестициялык келишим түзүлгөн.
Натыйжада өндүрүш кайра жанданып, бүгүнкү күнгө чейин мамлекеттин бюджетине 9 млрд сомдон ашык каражат түшүрүлдү. Ишкана бир жылда 1 тонна 820 кг алтын өндүрдү. Кийинки жылдан тартып жылына 2 тоннадан ашык алтын өндүрүү пландалууда.
Ошол эле учурда мамлекеттик бюджетке жыл сайын 30 млндоллардан ашык салыктык киреше түшөт. Мындан тышкары, жергиликтүү бюджетке 200 млн сом которулат.
Бүгүнкү күндө кенде 600дөн ашык адам эмгектенсе, алардын 90%ы жергиликтүү тургундар.
