Тигүүчүлөр 2026-жылдын аягына чейин бирдиктүү салыктан бошотулду
Бирдиктүү салык төлөөдөн жана бирдиктүү салык боюнча салыктык отчет берүүдөн тигүү жана текстиль өндүрүшүн жүргүзгөн субъекттер, ЕАЭБ мүчө мамлекеттерде электрондук соода аянтчалары аркылуу товарларды сатууну жүзөгө ашырган субъекттер (селлерлер) үчүн салыктык жеңилдиктер берилди.
КРнын Салык кызматынын маалыматына караганда, аталган категориядагы тигүүчүлөр 2026-жылдын 1-августунан 31-декабрына чейин бошотулат. Бул бошотуу КРнын салык органдарында белгиленген тартипте катталган субъекттерге карата колдонулат.
Селлерлер үчүн жеңилдикти колдонууда — электрондук соода аянтчасынан субъект тиешелүү платформада өзүнүн ИННин колдонуу менен иш жүргүзүп жаткандыгын тастыктаган документтин болушу шартталат.
Билдирүүгө ылайык, салыктан бошотуу бирдиктүү салыкка жана ал боюнча отчеттуулукка гана тиешелүү. Башка салыктык милдеттенмелер жана мамлекеттик социалдык камсыздандыруу боюнча милдеттенмелер сакталуу бойдон калат.
Тактап айтканда, жалданма кызматкерлер киреше салыгын жана камсыздандыруу төгүмдөрүн төлөөдөн бошотулбайт. Иш берүүчүлөр мурдагыдай эле өз кызматкерлери үчүн тиешелүү төлөмдөрдү эсептеп, кармап калууга жана бюджетке которууга милдеттүү.
