Бишкекке акыркы эки жылда 1 млрд доллардан ашык инвестиция тартылды
Бишкек шаарына акыркы эки жылда 1 млрд АКШ долларынан ашык инвестиция тартылды. Бул тууралуу мэриянын коллегиялык жыйынында мэрдин биринчи орун басары Кубанычбек Иманалиев билдирди.
Маалыматка ылайык, тартылган каражаттар коммуналдык жана социалдык инфраструктураны өнүктүрүүгө, калдыктарды кайра иштетүүгө, көп функционалдуу комплекстерди курууга жана шаардык объектилерди жаңылоого багытталууда.
Учурда Бишкекте бир катар ири инвестициялык долбоорлор ишке ашырылууда. Алардын арасында катуу тиричилик калдыктарын кайра иштетип, энергия өндүрүү долбоорунун 230 млн долларлык экинчи этабы бар.
Ошондой эле Hyper Partners көп функционалдуу комплексине 300 млн доллар, Royal Central Park комплексине 300 млн доллардан ашык инвестиция каралган.
Бишкектин тазалоочу курулмаларын модернизациялоо долбоорунун наркы 70,9 млн долларды түзөт. Мындан тышкары, социалдык инфраструктурасы бар "Оптима" комплексине 1 млрд 200 млн сом каралган.
Мэриянын маалыматына ылайык, бул долбоорлор жаңы объектилерди жана жумуш орундарын түзүүгө, ошондой эле борбор калаанын инфраструктурасын өнүктүрүүгө багытталган.
