Бишкекте орточо эмгек акы 64 293 сомду түздү
Бишкек шаарында 2026-жылдын биринчи жарым жылдыгында номиналдык орточо айлык эмгек акы 64 293 сомду түздү. Бул 2025-жылдын тиешелүү мезгилине салыштырмалуу 23%га көп. Бул тууралуу мэриянын коллегиялык жыйынында мэрдин биринчи орун басары Кубанычбек Иманалиев билдирди.
Маалыматка ылайык, жылдын биринчи жарымында борбор калаада 76 млрд 4 млн сомдук өнөр жай продукциясы өндүрүлдү. Өнөр жай өндүрүшүнүн физикалык көлөмүнүн индекси 116,1%ды түзүп, Бишкектин республикадагы жалпы өндүрүштөгү үлүшү 16,9%га жетти.
"100 өнөр жай ишканасы – 2026" долбоорунун алкагында Бишкекте төрт жаңы өндүрүш ишканасын ишке киргизүү пландалууда.
Ошондой эле рыноктук кызмат көрсөтүүлөрдүн көлөмү 777 млрд 799 млн сомду түзүп, 9,1%га өстү. Бишкектин республикадагы рыноктук кызмат көрсөтүүлөрдүн жалпы көлөмүндөгү үлүшү 64,3%ды түздү.
Курулуш тармагында 54 млрд 920 млн сомдук продукция өндүрүлүп, көлөмү өткөн жылдын тиешелүү мезгилине салыштырмалуу 1,7 эсеге өстү. Бишкектин өлкөдөгү жалпы курулуш көлөмүндөгү үлүшү 26,3% болду.
Ал эми керектөө бааларынын индекси 2025-жылдын тиешелүү мезгилине салыштырмалуу 110,1%ды түздү.
