Декларацияланбаган товарлар: мамлекетке 3,8 млн сомдон ашык зыян өндүрүлдү
"Нарын" бажысынын кызматкерлери бажы мыйзамдарынын талаптарын бузуу фактысын аныктады. Бул тууралуу Мамлекеттик бажы кызматы билдирди.
Маалыматка ылайык, 3-5-август күндөрү Кытайдан "Б.Х.Г." ЖЧКсынын дарегине эки оор жүк ташуучу унаа менен товарлар жеткирилген. Документтерде алар жалпы салмагы 9 440 кг болгон металл конструкциялар жана 37 100 кг болот түтүктөр катары көрсөтүлгөн.
Бажы көзөмөлүнүн жүрүшүндө белгиленген тартипте декларацияланбаган 56 түрдөгү товар табылган.
Аталган товарларды ички керектөө үчүн чыгарууда төлөнүүгө тийиш болгон бажы төлөмдөрүнүн суммасы 3 млн 824 миң сомдон ашкан.
Бул факт боюнча материалдар катталып, укуктук баа берүү үчүн Мамлекеттик бажы кызматынын Тергөө башкармалыгына өткөрүлүп берилген.
Тергөө иштеринин жыйынтыгында мамлекетке келтирилген 3,8 млн сомдон ашык зыян толугу менен өндүрүлдү.
