Документсиз товар ташыгандарга 350 миң сомго чейин айып салынат
Кыргызстанда ЕАЭБге мүчө мамлекеттерден товарларды жана транспорт каражаттарын тиешелүү документтери жок алып өтүү үчүн жоопкерчилик күчөтүлдү. Бул тууралуу Мамлекеттик салык кызматы билдирди.
Жаңы талаптар 2026-жылдын 21-августунан тартып күчүнө кирет. Айып пулдун өлчөмү товардын наркына жана укук бузууну ким жасаганына жараша белгиленет.
Товардын наркы 500 миң сомдон аз болсо, жеке жактарга 50 миң сом, юридикалык жактарга 100 миң сом айып салынат. Товардын баасы 500 миң сомдон 1 млн сомго чейин болсо, айып пул жеке жактар үчүн 100 миң, юридикалык жактар үчүн 200 миң сомду түзөт.
Ал эми товардын наркы 1 млн сом жана андан жогору болгон учурда жеке жактарга 200 миң сом, юридикалык жактарга 300 миң сом айып каралган.
Эгер мыйзам бузуу бир жылдын ичинде кайталанса, айып пулдун көлөмү көбөйөт. Мындай учурда товардын наркына жараша жеке жактарга 70 миңден 250 миң сомго чейин, юридикалык жактарга 130 миңден 350 миң сомго чейин айып салынат.
Мындан тышкары, бир жылдын ичинде укук бузуу кайталанган учурда тиешелүү товарлар конфискацияланат.
Салык кызматы ташуучуларды, салык төлөөчүлөрдү жана транспорт каражаттарынын ээлерин чек арадан товар алып өтүүдө зарыл документтерди өз убагында жана туура тариздөөгө чакырды.
