Кыргызстан күйүүчү май импорттоо боюнча жаңы келишимдерди түзөт
Министрлер Кабинетинин төрагасы Адылбек Касымалиев өлкөнүн ички рыногун күйүүчү-майлоочу материалдар менен камсыздоо маселеси боюнча жыйын өткөрдү. Бул тууралуу Өкмөттүн басма сөз кызматынан билдиришти.
Жыйында Борбор Азиядагы жана Кыргызстандагы мунай рыногунун учурдагы абалы, күйүүчү май импорттоо жана керектүү запастарды түзүү маселелери талкууланды.
Ошондой эле күйүүчү-майлоочу материалдар менен иштеген компанияларга мамлекеттик субсидия берүү жана ички рынокту мунай заттары менен жетиштүү деңгээлде камсыздоо боюнча аткарылып жаткан иштер каралды.
Жыйындын соңунда Адылбек Касымалиев өлкөнү мунай заттары менен үзгүлтүксүз камсыз кылуу, рыноктогу абалга мониторингди күчөтүү жана күйүүчү май компаниялары менен иш алып баруу боюнча бир катар тапшырмаларды берди.
Мындан тышкары, мунай заттарын импорттоо боюнча жаңы келишимдерди түзүү, мамлекеттик чек арадагы логистикалык маселелерди чечүү жана зарыл чараларды өз убагында көрүү тапшырылды.
Маалыматка ылайык, Кыргызстан күйүүчү-майлоочу материалдар менен камсыздоо багытында Россия, Беларусь, Кытай жана Өзбекстан менен кызматташат.
Өлкөнүн мунай заттарына болгон жылдык керектөөсү орточо 1,5 млн тоннадан ашат.
