Кыргызстанда билим берүүгө каралган каражат 5 жылда 35 млрд сомго көбөйдү

Кыргызстанда билим берүү тармагына бөлүнгөн каражат 2021-жылдагы 40 млрд сомдон 2025-жылы 75 млрд сомго чейин өстү. Бул тууралуу Министрлер Кабинетинин төрагасы Адылбек Касымалиев "Доор өзгөрткөн билим: жаратман мугалим – өнүккөн өлкө" улуттук педагогикалык форумунда билдирди.

Анын айтымында, акыркы жылдары билим берүү тармагын каржылоо менен катар инфраструктураны жакшыртуу боюнча да иштер жүргүзүлдү. Акыркы беш жылда өлкө боюнча 390дон ашык жаңы мектеп курулуп, 110дон ашык мектеп капиталдык оңдоодон өткөрүлдү.

Мектепке чейинки билим берүү менен камтуу да өскөн. 2021-жылы бул көрсөткүч 22 пайызды түзсө, 2025-жылы 51 пайызга жеткен. 2030-жылга чейин аны 80 пайызга жеткирүү милдети коюлган.

Ошондой эле окуу китептерин басып чыгаруу жана билим берүү мекемелеринин санариптик инфраструктурасын өнүктүрүү боюнча иштер жүргүзүлүүдө.

Касымалиев жаңы окуу жылында жасалма интеллектти окутууга киргизүү, жекелештирилген билим берүүнү өнүктүрүү жана 12 жылдык билим берүү системасынын экинчи этабына өтүү негизги багыттардын бири экенин белгиледи.

Маалыматка ылайык, 2026-жылы Жалпы республикалык тестирлөөнүн орточо баллы 119,8ден 128 баллга жогорулап, 56 окуучу алтын сертификатка ээ болду.