ШКУ саммити жана Көчмөндөр оюндарына даярдык чыгымдары аудиттен өтөт
Бишкекте Шанхай кызматташтык уюмунун саммитине жана VI Дүйнөлүк көчмөндөр оюндарына даярдык көрүүгө байланышкан чыгымдарга аудит жүргүзүлөт. Мындай тапшырма Бишкек мэриясынын коллегиялык жыйынында берилди.
Жыйын мэр Айбек Жунушалиев жана Бишкек шаардык кеңешинин төрагасынын милдетин убактылуу аткаруучу Жылдызбек Абдраимовдун төрагалыгы алдында өттү.
Отурумда борбор калаанын ири эл аралык иш-чараларга даярдыгына өзгөчө көңүл бурулуп, жооптуу түзүмдөргө даярдык иштерине байланышкан чыгымдарды текшерип, аудит жүргүзүү тапшырылды.
Текшерүүнүн жыйынтыгында тиешелүү негиздер болгон учурда материалдарды белгиленген тартипте укук коргоо органдарына берүү каралган.
Мындан тышкары, К. Кожомкул атындагы Спорт сарайында эл аралык деңгээлдеги бассейн куруу долбоорун ишке ашыруу өзгөчө көзөмөлгө алынат.
Жыйындын соңунда мэриянын түзүмдүк бөлүмдөрүнүн жана муниципалдык ишканалардын жетекчилерине берилген тапшырмаларды өз убагында жана сапаттуу аткаруу милдеттендирилди.
