5 жылда бюджетке түшкөн салыктын көлөмү 30 жыл мурдагы көрсөткүчтөн ашты
Кыргызстандын мамлекеттик бюджетине акыркы беш жарым жылда түшкөн салыктык төлөмдөрдүн көлөмү өлкөнүн буга чейинки 30 жылда чогулган салыктын суммасынан ашты.
Салык кызматынын маалыматына ылайык, 2021-жылдан 2026-жылдын июль айына чейин Кыргызстандын мамлекеттик бюджетине 1,2 трлн сомдон ашык салыктык төлөм түшкөн. Ал эми 1991–2020-жылдары, башкача айтканда, 30 жыл аралыгында мамлекеттик бюджетке түшкөн салыктык төлөмдөрдүн жалпы көлөмү 724 млрд сомду түзгөн.
Ошентип, акыркы беш жарым жылда бюджетке түшкөн салык мурунку 30 жылдагы көрсөткүчтөн кеминде 476 млрд сомго көп болгон. Мындай динамика бюджеттин салыктык кирешелери кыйла өскөнүн көрсөтөт.
Мамлекеттик салык кызматынын маалыматы боюнча, өсүшкө салыктык башкарууну жакшыртууга, бизнес жүргүзүүгө шарттарды түзүүгө жана көмүскө экономикада иштеген субъекттердин ишмердигин мыйзамдаштырууга багытталган реформалар таасир эткен.
Салыктык реформалардын алкагында салыктык башкарууну өркүндөтүү жана экономикалык ишмердикти ачык жүргүзүүгө шарт түзүү боюнча чаралар ишке ашырылып жатат.
