“Ак кеме” мейманканасы жаңыланып, ишке берилди
Бишкек шаарында жаңыланган «Ак-Кеме» мейманканасынын ачылыш аземи болуп өттү. Иш-чарага өлкө башчы Садыр Жапаров баштаган коноктор катышты. Анын жүрүшүндө өлкө башчы мейманкана Акаевдин заманында түркиялык ишкерлер тарабынан курулгандыгын, кийин мамлекет объектини мыйзамсыз тартып алгандыктан, ишкер Нью-Йорктогу сотко кайрылып, Кыргызстанды 16,5 млн доллар доого жыккандыгын билдирди.
Садыр Жапаровдун айтымынада, учурда мейманкана 15 жылга ижарага берилип, кийин мейманкана кайра мамлекетке өтөрүн жана ал ай сайын 60 миң доллардан акы төлөп турарын белгиледи.
“Жөн эле 15 жыл колдонбойт, жөн эле арендага берип коюп, 15 жыл карап отурбайбыз, бүгүнкү күндөн баштап айына 60 миң доллардан мамлекетке аренда төлөп турат. 60 миң доллар! Мурда 60 миң доллар эмес, тескерисинче 2023-жылы биз алган мезгилде 30 миллион сомдун тегерегинде ушул имараттын карызы бар болчу, ар кайсы төлөмдөр боюнча, коммуналык төлөмдөр бар. Мына ошентип бул имаратты инвесторлорго берип, 15 жылга мына ушундай абалга келтирдик.” – деди, өлкө башчы.
Президенттин билдирүүсүнө караганда, “Ак кеме” - 174 бөлмөдөн, конференцияларды жана ар кандай ишкердик жолугушууларды өткөрүүгө ылайыктуу залдары, ресторандар, спорттук жана эс алуу инфратүзүмү менен камсыздалды. Эми жаңыланган “Ак-Кеме” өлкөгө келген конокторду элибизге мүнөздүү меймандостук менен тосуп, борбор калаанын жана жалпы Кыргызстандын аброюн арттырган жайлардын бири катары кабыл алмакчы.
