"Карамык" менен "Эркештамда" фитосанитардык көзөмөл күчөтүлдү
"Карамык" жана "Эркештам" өткөрмө пункттарында өлкөгө киргизилип жаткан өсүмдүк продукцияларына жана жарандардын кол жүгүнө фитосанитардык көзөмөл күчөтүлдү. Бул тууралуу Суу ресурстары, айыл чарба жана кайра иштетүү өнөр жайы министрлиги билдирди.
Текшерүү учурунда фитосанитардык сертификаты жана тиешелүү документтери жок мөмө-жемиштер, жашылчалар, картошка, үрөндөр, көчөттөр жана башка өсүмдүк продукциялары аныкталууда.
Белгиленген талаптарга жооп бербеген жүктөр жана жарандардын кол жүгүндөгү продукциялар өлкөгө киргизилбей, кайра кайтарылууда.
Министрликтин маалыматына ылайык, көзөмөл карантиндик зыяндуу организмдердин өлкөгө киришине жана таралышына жол бербөө максатында жүргүзүлүүдө.
Жарандар чек ара аркылуу өсүмдүк продукцияларын алып өтүүдө фитосанитардык талаптарды сактоого чакырылды.
