Эгемендүүлүк күнүнө карата 75 ишкана ачылат
2026-жылы Кыргызстандын 7 облусунда 75 жаңы кайра иштетүүчү ишкана жана өндүрүш объектисин ишке берүү пландалууда. Бул 2025-жылга салыштырмалуу жаңы ишканалардын санын дээрлик 19%га көбөйтөт. Бул тууралуу Айыл чарба министринин орун басары Рысгүл Акимжанова билдирди.
Маалыматка ылайык, жаңы ишканалар сүт, эт, мөмө-жемиш жана жашылчаларды кайра иштетүү, азык-түлүк, балык жана канаттуулар продукциясын өндүрүү, ошондой эле сактоо, таңгактоо жана логистика багыттарында иш алып барат.
Долбоорлор Ош, Жалал-Абад, Баткен, Нарын, Талас, Ысык-Көл жана Чүй облустарын камтыйт.
Эске салсак, 2025-жылы 63 жаңы ишкана ишке берилип, 2 707 жумуш орду түзүлгөн.
Жаңы өндүрүштөрдүн ачылышы айыл чарба продукциясын өлкө ичинде терең кайра иштетүүнү кеңейтүүгө, кошумча наркты жогорулатууга жана аймактарда жаңы жумуш орундарын түзүүгө багытталган.
Министрлик долбоорлордун өз убагында ишке ашырылышына мониторинг жүргүзүп, тиешелүү колдоо көрсөтүүдө.
