Азык-түлүк коопсуздугу боюнча тапшырмалар берилди
Министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Эрлист Акунбековдун жетекчилиги алдында Азык-түлүк коопсуздугу жана тамактануу боюнча кеңештин жыйыны өттү.
Жыйында өлкөдөгү азык-түлүк коопсуздугунун учурдагы абалы, 2026-жылга карата 9 социалдык маанилүү азык-түлүк товарлары боюнча баланстар жана 2027-жылга пландар талкууланды.
Ошондой эле товарлардын импорту, бааларды турукташтыруу, күйүүчү-майлоочу майлар, логистика, мамлекеттик резерв жана калктын туура тамактануусу боюнча маселелер каралды.
Жыйынтыгында тиешелүү мамлекеттик органдарга бир катар тапшырмалар берилди. Анын ичинде 9 социалдык маанилүү азык-түлүк товары боюнча ыкчам аракеттенүү протоколдорун иштеп чыгуу, эт рыногундагы ишти күчөтүү, күзгү жана 2027-жылдагы жазгы талаа иштерине даярдыкты баштоо, жашылча-жемиштерди кайра иштетүүнү өнүктүрүү боюнча программа даярдоо тапшырылды.
Мындан тышкары, азык-түлүк коопсуздугу боюнча мыйзамдык базаны жаңылоо, фермерлердин жана керектөөчүлөрдүн коопсуз тамактануу боюнча маалымдуулугун жогорулатуу, ошондой эле илимий-изилдөө институтунун аналитикалык борбор катары ишин күчөтүү милдети коюлду.
Эрлист Акунбеков тапшырмалардын аткарылышы көзөмөлгө алынарын айтып, белгиленген мөөнөттөрдүн бузулушу же иштин формалдуу аткарылышы үчүн жооптуу жетекчилердин жеке жоопкерчилиги караларын эскертти.
