Бишкек мэриясы бюджеттик чыгымдарга аудит жүргүзөт
Бишкек мэриясында борбор калаада өткөн ири эл аралык иш-чараларга даярдык көрүүнүн жыйынтыгы чыгарылып, мындан аркы милдеттер аныкталды. Бул тууралуу мэриянын басма сөз кызматынан кабарлашты.
Мэр Айбек Джунушалиев шаардык кызматтарга, муниципалдык ишканаларга жана райондук администрацияларга аткарган иштери үчүн ыраазычылык билдирди. Ошондой эле учурда жолдорду жана тротуарларды оңдоо, имараттардын фасаддарын жаңылоо, жашылдандыруу жана шаарды көрктөндүрүү иштери улантыларын белгиледи.
Жыйында бюджеттик каражаттарды пайдалануу маселесине өзгөчө көңүл бурулду. Мэр жолдорду, жол инфраструктурасын жана фасаддарды оңдоого бөлүнгөн каражаттардын максаттуу пайдаланылышын камсыз кылуу үчүн ар бир объект боюнча чыгымдарга аудит жүргүзүүнү тапшырды.
Джунушалиев иштердин наркын негизсиз жогорулатууга жол берилбеши керектигин айтып, мыйзам бузуулар аныкталса, тиешелүү материалдар укук коргоо органдарына өткөрүлүшү зарыл экенин белгиледи.
Ошондой эле аткарылган иштердин сапатына, мөөнөттөрдүн сакталышына жана бюджеттик каражаттардын натыйжалуу пайдаланылышына көзөмөлдү күчөтүү тапшырылды.
