Ноокен районунун бюджети 5 жылда 2 эсеге жакын өстү
Президент Садыр Жапаров бүгүн Жалал-Абад облусуна болгон иш сапарынын алкагында Ноокен районунун активи жана тургундары менен жолугушту. Бул тууралуу өлкө башчысынын администрациясы маалымдады.
Жолугушууда аймактын социалдык-экономикалык өнүгүүсү, жергиликтүү бюджеттин өсүшү жана инфраструктуралык долбоорлордун ишке ашырылышы талкууланды.
Мамлекет башчысынын маалыматына ылайык, Ноокен районунун бюджети 2021-жылы 299 млн сомду түзсө, 2025-жылдын жыйынтыгы боюнча 619 млн сомго жеткен.
Мындан тышкары, 2026-жылдын тогуз айында райондогу капиталдык курулуштун 25 объектисине 714 млн сом каралган. Анын ичинен 1-октябрга карата 677 млн сом бөлүнгөн.
Айыл чарбасын колдоо багытында да иштер жүргүзүлүүдө. Тактап айтканда, 2026-жылы райондун 154 фермерине жалпы суммасы 128 млн сом болгон жеңилдетилген насыялар берилген.
Мындан тышкары, социалдык объектилерди куруу, оңдоо жана калкты таза ичүүчү суу менен камсыз кылууну жакшыртуу иштери улантылууда.
