“Өкмөттүк акселераторлор” программасынын алкагында үч реформа ишке ашты
Бүгүн Министрлер кабинетинин төрагасы Адылбек Касымалиев “Өкмөттүк акселераторлор” 100 күндүк программасынын алкагында ишке ашырылган үч реформанын жыйынтыгын чыгарды. Бул тууралуу өкмөттүн басма сөз кызматы билдирди.
2026-жылдын 18-майында аталган программанын алкагында социалдык-экономикалык маселелерди чечүүгө багытталган 3 реформа демилгеленген.
Биринчи реформа эмгек мигранттарынын мамлекеттик пенсиялык камсыздандырууга жеткиликтүүлүгүн кеңейтүүгө багытталган. Эми чет өлкөдө иштеген кыргызстандыктар “Түндүк” тиркемеси жана Салык төлөөчүнүн кабинети аркылуу пенсиялык камсыздандырууга дистанциялык түрдө катышып, ыктыярдуу төгүмдөрдү онлайн төлөй алышат.
Экинчи реформа окуучулардын алдын алуу медициналык кароосун санариптештирүүгө арналды. 095/у жана 026/у формалары электрондук форматка өткөрүлүп, ата-энелер аларды «Түндүк» тиркемесинен көрө алышат. Бул система кагаз документ жүгүртүүнү азайтып, жылына болжол менен 50 млн сом бюджеттик каражатты үнөмдөөгө мүмкүндүк берет.
Үчүнчү реформа медициналык жана фармацевтикалык ишмердүүлүккө лицензия берүү процессин жөнөкөйлөттү. Эми ишкерлер документтерди онлайн тапшырып, мамлекеттик алымды төлөп, арыздын статусун интернет аркылуу көзөмөлдөй алышат. Лицензия берүү мөөнөтү 30 күндөн 6–15 күнгө чейин кыскарды.
Адылбек Касымалиев реформаларды улантуу жана алардын аткарылышына мониторинг жүргүзүүнүн маанилүүлүгүн белгиледи.
