Балыкчы шаарынын бюджетинен 826,7 млн сомдук каржылык бузуулар аныкталды
Эсептөө палатасынын Ысык-Көл жана Нарын облустары боюнча аймактык бөлүмү Балыкчы шаарынын 2024–2025-жылдардагы жергиликтүү бюджетинин түзүлүшүнө жана аткарылышына аудит жүргүзүп, каржылык бузууларды аныктады.
Аудиттин жыйынтыгында жалпы 826 млн 750 миң сомдук каржылык бузуулар аныкталып, анын ичинен 776 млн 576,6 миң сом калыбына келтирилүүгө тийиш болсо, 425 млн 128,1 миң сом калыбына келтирилди.
Эсептөө палатасынын маалыматына караганда, эң ири суммадагы бузуулар мүлктүн сакталышын камсыз кылбоого байланыштуу болуп, 390 млн 397,5 миң сомду түзгөн. Анын ичинен 92 млн 821 миң сом калыбына келтирилген. Ошондой эле бухгалтердик эсеп боюнча талаптардын бузулушу 332 млн 253,1 миң сом деп аныкталып, анын 331 млн 786,5 миң сому калыбына келтирилген.
Мындан тышкары, мүлктү пайдалануу боюнча 44 млн 803,2 миң сомдук, бюджеттин долбоорун түзүүдө 28 млн 485,1 миң сомдук, милдеттенмелерди кабыл алуу жана бекитилген көрсөткүчтөрдөн ашыкча чыгымдоо боюнча 10 млн 588,9 миң сомдук бузуулар аныкталган.
Айрым материалдар, анын ичинде Балыкчы шаардык мэриясынын алдындагы “Мүлк” муниципалдык ишканасында жетекчилер алмашканда документтерди кабыл алуу-өткөрүп берүү актысынын түзүлбөгөнү жана мурдагы башкы эсепчинин айрым эмгек акы документтерин жок кылганы тууралуу маалыматтар укуктук баа берүү үчүн Ысык-Көл облустук прокуратурасына жөнөтүлдү. Ошондой эле Балыкчы шаардык дене тарбия жана спорт бөлүмүндө 776,6 миң сом чыгым тастыктоочу документтерсиз жүргүзүлгөнү боюнча материалдар да прокуратурага сунушталган.
Аудиттин жыйынтыгы боюнча аныкталган бузууларды жана кемчиликтерди жоюу үчүн Балыкчы шаарынын мэрине, шаардык Кеңешке жана тиешелүү мекеме-ишканаларга отчет, жазма буйруктар жана сунуштар жөнөтүлдү.
