Бажыда металл прокатын мыйзамсыз тариздөө фактысы аныкталды
КРнын Мамлекеттик бажы кызматынын Тергөө башкармалыгы кылмыш ишин иликтөөнүн алкагында Кытайдан "Ч.К.М." ЖЧКсынын дарегине алып келинген металл прокатынын партиясын мыйзамсыз тариздөө фактысын аныктады.
Бажы кызматынын маалыматына ылайык, Түндүк-чыгыш бажысынын "Кант" бажылык тариздөө жайынын башкы инспектору К.М.Т. жана "Ч.К.М." ЖЧКсынын өкүлү А.Э.З. товарды бажылык тариздөө учурунда мыйзам бузууга жол беришкен.
Товарды туура эмес классификациялоонун натыйжасында бажы төлөмдөрү төмөндөтүлүп, мамлекетке өзгөчө ири өлчөмдө зыян келтирилгени аныкталган.
Тергөө иштеринин жыйынтыгында аталган адамдарга КР Кылмыш-жаза кодексинин 337-беренесинин 3-бөлүгү боюнча айып тагылды. Бишкек шаарынын Октябрь райондук сотунун чечими менен аларга карата камакка алуу түрүндөгү бөгөт коюу чарасы колдонулуп, №1 тергөө абагына киргизилди.
Мамлекеттик бажы кызматы мындай мыйзам бузууларга бөгөт коюу иштерин улантарын жана тышкы экономикалык иштин катышуучулары менен бажы органдарынын кызматкерлери тарабынан мыйзам талаптарынын сакталышын камсыз кылуу принцибин карманарын билдирди.
