“Бишкек шаардык транспорт” МИ автобустарга 13,5 млн сомго айнек сатып алат
“Бишкек шаардык транспорт” муниципалдык ишканасы ZhongTong жана Isuzu Citiport автобустарына айнек сатып алууга 13,5 млн сомдук тендер жарыялады.
Сатып алуулар порталындагы маалыматка таянсак, сунуштар 15-сентябрга чейин кабыл алынат. Жеңүүчү компания келишим түзүлгөндөн кийин айнектерди 40 календардык күндүн ичинде жеткириши керектелет.
Сатып алуунун негизги бөлүгү ZhongTong автобустары үчүн каралган. Ага алдыңкы жана арткы маңдайкы айнектер, жүргүнчүлөрдүн эшиктери, айдоочунун терезелери жана оң-сол капталдагы жылма айнектер кирет.
Мындан тышкары, Isuzu Citiport автобустары үчүн 25 алдыңкы маңдайкы айнек сатып алынат.
Алдын ала төлөм каралган эмес. Товардын 100% баасы ал кабыл алынгандан кийин төлөнөт. Жеткирүү мөөнөтү кечиктирилсе, ар бир күн үчүн 0,1% айып пул салынат, бирок анын жалпы көлөмү келишимдин суммасынын 5 пайызынан ашпайт.
