Эмгек мигранттары үчүн ыктыярдуу пенсиялык камсыздандыруу кызматы санариптештирилди
Мамлекеттик салык кызматы эмгек мигранттары үчүн ыктыярдуу мамлекеттик пенсиялык камсыздандыруу боюнча санариптик кызматтарды ишке киргизгенин билдирди. Эми чет өлкөдө жүргөн Кыргызстандын жарандары мамлекеттик органдарга барбастан, электрондук камсыздандыруу полисин аралыктан тариздей алышат.
МСКнын басма сөз кызматынын маалыматына караганда, кызматты пайдалануу үчүн жаран “Түндүк” мобилдик тиркемесине катталышы шарт. Андан кийин салык төлөөчүнүн жеке кабинетине “Түндүк” платформасынын Бирдиктүү идентификациялоо системасы аркылуу кирүүгө болот.
Жеке кабинетте эмгек мигранттары үчүн ыктыярдуу камсыздандыруу төгүмдөрүнүн 10%, 8% жана 2% өлчөмүндөгү үч тарифи сунушталат. Колдонуучу ылайыктуу тарифти тандап, электрондук полисти тариздеп, төлөмдү Visa, Mastercard же “Элкарт” карталары аркылуу онлайн жүргүзө алат. Зарыл болгон маалыматтар КРнын Социалдык фондунун маалыматтык системалары менен интеграциялоо аркылуу автоматтык түрдө текшерилет.
Кызмат Мамлекеттик салык кызматы, Социалдык фонд, “Кызмат” мамлекеттик мекемеси жана “Түндүк” ААКнын “Өкмөттүк акселераторлор” аттуу 100 күндүк программанын алкагындагы биргелешкен ишинин жыйынтыгында ишке киргизилди.
Жаңы кызмат эмгек мигранттарына чет өлкөдө жүргөнүнө карабастан, ыктыярдуу мамлекеттик пенсиялык камсыздандыруу мүмкүнчүлүгүн пайдаланууга шарт түзөт.
