Кыргызстанда өндүрүлгөн төө буурчакты Пакистанга экспорттоо макулдашылды
МинКаб Төрагасынын орун басары – министр Эрлист Акунбеков Пакистандын Кыргызстандагы Атайын жана Ыйгарым укуктуу Элчиси - Алтамаш Вазир Ханды кабыл алды.
Жолугушууда эки өлкөнүн лидерлери жетишкен макулдашууларды конкреттүү инвестициялык долбоорлорго жана реалдуу экономикалык натыйжаларга айландыруу зарылдыгын белгилешти.
Сүйлөшүүлөрдүн негизги темасы - Кыргызстанда өндүрүлгөн төө буурчакты Пакистан рыногуна экспорттоо болду. Тараптар кыргызстандык өндүрүүчүлөр менен пакистандык импорттоочулардын ортосунда түз ишкердик байланыштарды түзүү, соода көргөзмөлөрүнө өз ара катышуу жана продукцияны жеткирүүнүн конкреттүү көлөмдөрүн аныктоо маселелерин талкуулашты.
Кыргызстандын төө буурчак экспорттоо боюнча жылдык потенциалы 50 миң тоннадан ашат. 2025-жылы анын экспортунун жалпы наркы 67 млн АКШ долларын түзгөн.
Жолугушуунун жыйынтыгында, Пакистан рыногуна кыргыз айыл чарба продукцияларын чыгарууну кеңейтүү жана жакынкы эки жылда эки өлкөнүн соода жүгүртүүсүн 200 млн АКШ долларына чейин жеткирүү багытында биргелешкен практикалык иштерди күчөтүү боюнча макулдашууга жетишилди
