Балыкчы шаарында “826,7 млн сом уурдалган” деген маалымат туура эмес
Кыргызстандын Эсептөө палатасы Балыкчы шаарынын жергиликтүү бюджетинин түзүлүшү жана аткарылышы боюнча жүргүзүлгөн аудиттин жыйынтыгын түшүндүрдү. Эсептөө палатасынын Ысык-Көл жана Нарын облустары боюнча аймактык бөлүмү 2024-жылдын 1-январынан 2025-жылдын 31-декабрына чейинки мезгилди камтыган шайкештик аудитин жүргүзгөн.
Аудиттин жыйынтыгы боюнча 826,7 млн сом көлөмүндө финансылык бузуулар жана шайкешсиздиктер аныкталган. Бирок Эсептөө палатасы бул сумманы “уурдалган” же “коромжуга учураган” акча катары түшүндүрүү туура эмес экенин белгиледи.
Маалыматка ылайык, анын 332,2 млн сому бухгалтердик эсепти жүргүзүүдөгү каталарга, анын ичинде дебитордук жана кредитордук карыздарды эсепке алууга байланыштуу болгон. Анын ичинен 331,8 млн сом же 99,8%ы аудиттин жүрүшүндө калыбына келтирилген.
Мындан тышкары, 390,3 млн сом муниципалдык мүлк объекттерин эсепке алуу жана инвентаризациялоо боюнча процедуралык маселелерге байланыштуу болгон. Эсептөө палатасынын маалыматына караганда, бул объекттердин баары ордунда бар, бирок аларды бухгалтердик эсепте талаптагыдай тариздөө зарыл болгон.
Аудиттин жүрүшүндө, аныкталган мыйзам бузуу фактылары, анын ичинде “Мүлк” муниципалдык ишканасы, Дене тарбия жана спорт бөлүмү жана “Автобекет” муниципалдык ишканасына байланыштуу материалдар укуктук баа берүү үчүн Ысык-Көл облусунун прокуратурасына жөнөтүлгөн.
