Таласта 200 млн сомдук төө буурчакты кайра иштетүүчү завод ачылды
КРнын Президенти Садыр Жапаров бүгүн, Талас облусуна болгон иш сапарынын алкагында Бакай-Ата районунда төө буурчакты кайра иштетүүчү ишкананын ачылышына жана онлайн форматта бир убакта өлкө боюнча 60 өнөр жай объектисин ишке киргизүү аземине катышты.
Таластын Бакай-Ата районунда төө буурчакты кайра иштетүүчү ишканасынын долбооруна 200 млн сом инвестиция салынган. Заводдун өндүрүштүк кубаттуулугу жылына болжол менен 40 миң тонна төө буурчакты кайра иштетүүгө жетет. Ишканада 100 жаңы жумуш орду түзүлгөн.
Ишкана заманбап технологиялык жабдуулар менен камсыздалып, өндүрүлгөн продукциянын сапаты жана коопсуздугу өзүнүн лабораториясында көзөмөлдөнөт.
Ачылыш аземинин алдында президент заводдун инфраструктурасы жана даяр продукция менен таанышып, технологиялык жабдууларды ишке киргизди. Садыр Жапаров Талас өрөөнүнүн айыл чарбасын, анын ичинде дан буурчак өсүмдүктөрүн өстүрүү үчүн жагымдуу шарттары бар экенин белгиледи.
Мамлекет башчысынын айтымында, буга чейин таластык дыйкандардын төө буурчагы негизинен сырьё катары сыртка сатылып келген. Эми аны өлкө ичинде кайра иштетип, кошумча наркы жогору даяр продукцияга айландыруу мүмкүнчүлүгү түзүлүүдө.
Өлкөдө дагы 60 өнөр жай объектиси ишке киргизилди
Таластагы заводдун ачылышы менен катар Кыргызстан боюнча 60 өнөр жай объектисин бир убакта онлайн форматта ишке киргизүү аземи өттү.
Алардын арасында курулуш материалдарын өндүрүү, логистика, айыл чарба продукциясын кайра иштетүү, энергетика жана башка багыттардагы ишканалар бар.
Президенттин маалыматына караганда, жыл соңуна чейин дагы 50гө жакын өнөр жай объектисин ишке киргизүү пландалууда.
Мамлекет башчысы жаңы өндүрүштөрдүн ачылышы ата мекендик продукциянын көлөмүн көбөйтүп, кошумча жумуш орундарын түзүүгө жана өлкөнүн экспорттук мүмкүнчүлүгүн жогорулатууга багытталганын айтты.
