“Бала ырысы” боюнча айрым эсептер тактоону талап кылууда
КРнын Эмгек, социалдык камсыздоо жана миграция министрлиги “Бала ырысы” мамлекеттик программасынын алкагында төлөмдөрдү жүргүзүүнү улантууда. 10-сентябрга карата министрлик тарабынан 232 229 алуучуга жалпы 285 588 480 сом которулуп берилген.
Министрликтин басма сөз кызматынан кабарлагандай, тийиштүү каражаттар бекитилген тизмелерге ылайык толук көлөмдө которулууда. Каражаттар банктарга түшкөндөн кийин, алар алуучулардын эсептерине чегерилет.
Бирок, айрым учурларда каражаттар алуучунун эсебинде чагылдырылбай калышы мүмкүн болгон себептерди аныктоо боюнча жекече тактоо иштери жүргүзүлүүдө. Тактап айтканда, кошумча текшерүүнү талап кылган учурлар бар. Алар:
- АБанкта — 334 эсеп;
- Элдик Банкта — 900 эсеп.
Белгилей кетсек, бул учурлар министрлик тарабынан каражаттар которулбай калганын билдирбейт. Учурда ар бир конкреттүү учур боюнча себептерди аныктоо максатында банктар менен биргеликте маалыматтарды жекече салыштыруу иштери жүргүзүлүүдө.
Министрлик алуучулардын банк эсептеринин абалын, банктык жана жеке маалыматтарынын актуалдуулугун, анын ичинде картанын колдонуу мөөнөтүн өз алдынча көзөмөлдөп туруу зарылдыгына билдирүүдө. Бул каражаттарды алууга тоскоолдук жаратышы мүмкүн болгон техникалык же банктык себептерди өз убагында аныктоого жана жоюуга мүмкүндүк берет.
