Жылуулук насосу көмүр мешине альтернатива катары сунушталууда
Бишкек шаарында жана Чүй облусунда экологиялык таза жылытуу системаларын орнотууга мамлекеттик жеңилдетилген насыя берүү уланууда. Жеке менчик үйлөрдун ээлери заманбап жана энергияны үнөмдөөчү жабдууларды сатып алуу жана орнотуу үчүн жылдык 6% менен беш жылга чейинки мөөнөткө 1 миллион сомго чейин насыя ала алышат.
Финансы министрлигинин маалыматына караганда, каржылоо “АБанк”, “Элдик Банк” жана “Бакай Банк” өнөктөш банктары аркылуу жүргүзүлүүдө. Долбоор жеке сектордо көмүр жагуудан чыккан зыяндуу заттарды азайтып, смогго каршы күрөшүүгө багытталган.
Жеңилдетилген насыянын алкагында үй ээлери жылуулук насостору сыяктуу заманбап жылытуу жабдууларын орното алышат. 24-августта Маевка айылында мамлекеттик программанын шарттарын түшүндүрүүгө арналган маалыматтык жолугушуу өттү. Ага Бишкектин Биринчи май районундагы 15тен ашык конуштун тургундары катышты. Алардын арасында «Ак-Босого», «Калыс-Ордо», «Көлмө», «Мурас-Ордо», «Тынчтык», «Аска-Таш» жана башка аймактардын жашоочулары болду.
Жолугушууда Кыргызстандын Финансы министрлигине караштуу Долбоорду ишке ашыруу бөлүмүнүн өкүлдөрү жеңилдетилген насыянын шарттары жана карыз алуучуларга коюлган талаптар тууралуу маалымат беришти. Жабдууларды жеткирүүчү компаниянын өкүлү жылуулук насосторунун иштөө принциптерин көрсөтүп, алардын көмүр менен жылытууга салыштырмалуу артыкчылыктарын түшүндүрдү.
Долбоордун негизги максаты — жеке секторду заманбап “жашыл” жылытуу технологияларына өткөрүү, көмүр керектөөсүн жана абага чыккан зыяндуу заттарды азайтуу.
