“Борбордук Азия – Корея Республикасы” форматындагы өнөр жай министрлеринин жыйыны болду

КРнын экономика жана коммерция министри Б.Т. Сыдыков “Борбордук Азия – Корея Республикасы” (C5+1) форматындагы өнөр жай министрлеринин 1-жыйынына катышууда. Бул тууралуу Экономика жана коммерция министрлигинин басма сөз кызматынан кабарлашты.

Билдирүүгө караганда, бул кызматташтык механизмин ишке киргизүү C5+1 форматындагы экономикалык өз ара аракеттенүүгө жаңы практикалык мазмун берүүгө багытталган маанилүү аянтчаны түздү.

Министр Б.Т. Сыдыков тараптарга - Кыргыз Республикасынын 2030-жылга чейинки Улуттук өнүктүрүү программасында белгиленген өлкөнүн олуттуу өнөр жай, инвестициялык жана инфраструктуралык потенциалы, ошондой эле өнүгүүнүн артыкчылыктуу багыттары тууралуу маалымат берди.

Тараптар төмөнкү багыттар боюнча өнөр жай жана инвестициялык кызматташтыкты илгерилетүүнүн практикалык механизмдерин жана мындан аркы чараларын талкуулашты:

-        өнөр жай кооперациясы жана өндүрүштү локалдаштыруу;
-        минералдык чийки затты терең кайра иштетүү;
-        өнөр жай инфраструктурасы жана индустриалдык парктар;
-        транспорт, логистика жана жаңы өндүрүштүк чынжырчалар.

Бул багыттар боюнча өз ара аракеттенүү Борбордук Азия өлкөлөрүнө жана Корея Республикасына зарыл инфраструктурасы бар аянтчаны гана түзбөстөн, заманбап технологияларды, өндүрүштү, кадрларды даярдоону жана даяр продукцияны аймактык рынокторго чыгарууну бириктирген толук кандуу өндүрүштүк экосистеманы калыптандырууга мүмкүндүк берет.

Жыйындын жыйынтыгы боюнча өнөр жай жана жеткирүү чынжырлары жаатында кызматташуу жөнүндө Корея Республикасы менен Борбордук Азиянын беш мамлекетинин ортосунда өз ара түшүнүшүү жөнүндө меморандумга өнөр жай министрлери кол коюшту.